Stuðul til gransking játtaður úr Sjúkrakassagrunninum
Granskingarnevndin hevur á fundi 5. desember 2019 játtað stuðul til fimm verkætlanir á heilsuøkinum. Tilsamans eru játtaðar 4 mió. kr. í seinasta umfarinum á Høvuðsøki 2 hjá Sjúkrakassagrunninum.
Maria Skaalum Petersen hevur fingið játtað kr. 851.734 til verkætlan á Deildini fyri Arbeiðs- og Almannaheilsu og Fróðskaparsetrinum við heitinum “Mikrobiom og Parkinson’s sjúka”.
Turið Hammer hevur fingið játtað kr. 828.856 til verkætlan á Deildini fyri Arbeiðs- og Almannaheilsu við heitinum ”Grundir til og kostnaður av høga títtleikanum av tarmbrunasjúkum í Føroyum”.
Eina H. Eliasen hevur fingið játtað kr. 1.076.896 til ph.d.-verkætlan á Deildini fyri Arbeiðs- og Almannaheilsu og Fróðskaparsetrinum við heitinum “Heilsustøðan hjá sjeyti og áttati ára gomlum føroyingum úr einum objektivum og subjektivum sjónarhorni”.
Jacobina Kristiansen hevur fingið játtað kr. 816.745 til ph.d.-verkætlan á Fróðskaparsetrinum og Landssjúkrahúsinum við heitinum ”Ávirkan av langtíðarvenjing á blóðstorknan hjá sjúklingum við hjartaæðrasjúku”.
Sjúrður F. Olsen hevur fingið játtað kr. 398.648 til verkætlan á Fróðskaparsetrinum við heitinum ” Frá føðing til ellisár: Íløga í granskingartilfeingi til at lýsa heilsu hjá føroyingum frá millumkrígsárunum”.
Stuðul frá Høvuðsøki 2 í Sjúkrakassagrunninum
Játtanirnar eru latnar frá høvuðsøki 2, ið er eitt av trimum høvuðsøkjum, sum fæið hjá niðurlagdu sjúkrakassunum skuldi lutast út til. Høvuðsøki 2 fevnir um gransking og menning á heilsuøkinum í Føroyum.
Játtaninar vóru latnar eftir tilmæli frá faknevndini, sum er sett at meta um umsóknir um stuðul frá Sjúkrakassagrunninum.
Í hesum umfarinum varð møguligt at søkja stuðul á øllum fimm raðfestu økjunum. Eitt krav fyri at kunna fáa játtað stuðul er, at tað verður mett sannlíkt, at verkætlanin kann menna heilsuøkið í Føroyum.
Tað komu fjúrtan umsóknir inn í hesum umfarinum, av hesum fingu fimm játtað stuðul. Ein játtanarpartur á ein góðan triðing er nakað hægri enn miðal fyri Granskingargrunnin.
Tilsamans 21 verkætlanir stuðlaðar
Í 2014 vóru settar 11,8 mió. kr. av til Høvuðsøki 2. Hesar hava verið játtaðar til verkætlanir í fýra umførum. Ein partur av uppruna játtanini var sambært leiðreglunum bundin í 5 ár. Í apríl 2019 var restfæið, umleið 2.8 mió. kr., leysgivið. Hendan upphæddin og afturgoldin stuðul frá tveimum steðgaðum verkætlanum varð lutað út í hesum seinasta umfarinum fyri Høvuðsøki 2.
Yvirlit yvir allar játtaðar verkætlanir sæst her
Stuðul enn tøkur á Høvuðsøki 1
Tað ber enn til at søkja stuðul til smærri verkætlanir, tiltøk og átøk frá Høvuðsøki 1. Les meira um treytir og møguleikar her