Stórur áhugi fyri Vísindavøku á ferð

Stórur áhugi var kring landið fyri at vitja Vísindavøkuna á ferð. Ferðin byrjaði 12. september í Havn og endaði 19. september í Hovi. Umleið hálvtannaðhundrað fólk nýttu høvi at hoyra fyrilestrar hjá granskarum um alt frá fruktbæri hjá seyði til koronudagbøkur.

Serliga á Sandi var stórur áhugi fyri Vísindavøkuni í ár. 40 fólk høvdu leitað sær inn á Sands Bókasavn at hoyra fyrilestrar um havfrøðiligar broytingar, sjóvarfalsorku og um hví føroyingar hava ilt í búkinum.

Á Landsbókasavninum í Havn vóru 30 fólk komin saman at hoyra um CO2 goymslu í føroysku undirgrundini, skíggjavanar og koronudagbøkur. Á Miðnámsskúlanum í Hovi hoyrdu 30 fólk fyrilestrar um fornfrøði, keyp og sølu av orku og broytingar í heilsustøðuni hjá eldri føroyingum.

Á Klaksvíkar Bókasavni vóru 20 fólk komin at hoyra um føroysku orkuskipanina, umsiting av pelagiskum fiskastovnum og um makrelegg. Og í Gamla Skúla í Sørvági hoyrdu 20 fólk fyrilestrar um 4D GNSS tíðarrøðir, samband millum ílegur og COVID-19 og um fruktbæri hjá føroyskum seyði.

Granskarar hava eisini hildið fyrilestrar fyri fleiri hundrað næmingum á miðnámsskúlunum í Vestmanna, á Kambsdali og í Hovi.

Framløgur, tiltøk og kappingar í Løkshøll

Vísindavøkan verður í ár fríggjadagin 23. september í Løkshøll í Runavík. Stóra tiltakið byrjar kl. 8.15 og endar umleið kl. 16.30. Á skránni eru 19 framløgur frá granskarum. Fleiri teirra snúgva seg um tíðarrák, ið er høvuðsevnið á Vísindavøkuni í ár. Tíðarrøðir hava stóran týdning fyri gransking. Við at kenna fortíð og nútíð er gjørligt at síggja rák, ið leiða inn í framtíðina.

Umframt framløgur eru hópin av framsýningum og tiltøkum fyri børn og vaksin inni í og uttanfyri Løkshøll. Seinnapartin verður snarrøðukapping, Tobbi fer at hugleiða um tíðarrák, gransking og miðling, og ársins miðlaheiðursløn verður handað.