Amerikanskir granskarar rýma úr USA

Stjórnin hjá Donald Trump, forseta í USA, hevur sett eina røð av átøkum í verk ímóti granskarum og vísindastarvsfólki, eftir at hon tók við valdinum í januar. Sambært eini kanning hjá viðurkenda vísindaliga tíðarritinum Nature hevur tað havt við sær, at 3 av 4 amerikanskum granskarum nú umhugsa at rýma úr USA.

Millum átøkini, sum amerikanskir granskarar eru raktir av, eru uppsagnir, niðurskurður í játtanum, avmarkingar fyri hvørji granskingarevni kunnu fáa stuðul og miðvís álop á ávísar vísindastovnar.

Meira enn 1200 av teimum 1600 granskarunum, ið Nature hevur spurt, siga, at teir umhugsa at flyta úr USA orsakað av ófriðinum kring granskingina, sum Trump stjórnin hevur skapt. 

Velja Evropa

Nøkur teirra, sum umhugsa at fara úr USA, eru úr øðrum londum og ætla nú at fara heim aftur. Fleiri umhugsa eisini at flyta til lond, har tey hava samstarvsfelagar. 

Serliga eru tað Evropa og Kanada, ið granskarar í USA hava áhuga fyri. 

Fleiri evropeiskir granskingarstovnar síggja nú møguleikar fyri at draga høgt mettar granskarar á amerikanskum universitetum til sín. 

- Vit heita á allar amerikanskar granskarar og granskarar úr øðrum londum í USA um at koma til Evropa. Her hava vit granskingarfrælsi, fígging og góðar karmar, segði Robert-Jan Smits, ið er rektari á niðurlendska universitetinum TU Eindhoven á eini ráðstevnu í Brússel í februar. Robert-Jan Smits er eisini limur í Íslendska ráðnum fyri gransking og nýskapan.

Les meira um kanningina í Nature her.