Stuðul til gransking 2025
Til ber at søkja um stuðul til gransking frá Granskingarráðnum eina ferð um árið.
Komandi umsóknarfreistin verður 17. februar 2025, kl. 12.00 (á middegi) føroyska tíð.
Stuðul kann latast til gransking, ið verður:
- framd av føroyskum granskara ella
- framd í samstarvi við føroyskan granskingarstovn ella
- mett at hava samfelagsligan týdning fyri Føroyar
Stuðul kann latast verkætlanum við grund- og nýtslugransking:
- ph.d.-verkætlanum
- postdoc og øðrum verkætlanum, sum eru longri enn 6 mánaðir
- vinnuligum granskingarverkætlanum
Dentur verður lagdur á:
Vísindaliga góðsku, ávirkan og greiða verksetan
Tað er ein fyrimunur, at tann einstaka verkætlanin styrkir føroyska granskingarumhvørvið við:
- dátum og varandi vitan og førleikum
- samstarvi millum fleiri granskarar/granskingarstovnar og/ella vinnufyritøkur
- altjóða samstarvi og flytføri
Tað er krav, at:
- í minsta lagi 1/3 verður fíggjaður av øðrum enn Granskingarráðnum. Er talan um vinnuverkætlan, so er kravið í minsta lagi 1/2 viðfígging.
Minstamark fyri stuðli til eina verkætlan er 300.000 kr. Einki loft er fyri samlaðu fíggjarætlanina, men játtan frá Granskingarráðnum fer sjáldan væl upp um 1,1 mió. kr. til granskingarverkætlanir, ella 1,7 mió. kr. til ph.d.-verkætlanir.
Tað verða væntandi upp til 9 mió. kr. tøkar til stuðul í 2025.
Vinarliga les krøv og vegleiðing í skjalinum Terms of reference, áðrenn umsóknin verður send.
Ein fyrimynd er eisini til verkætlanarlýsingina
Umsóknir skulu skrivast á enskum á umsóknarportalinum.
Umsóknir um stuðul úr stuðulsskipanini skulu nágreiniliga lýsa ta verkætlan, sum stuðul verður søktur til. Eisini skulu umsóknirnar gjølla lýsa fakliga og vísindaliga førleika umsøkjarans. Umsøkjari skal skjalprógva sín fakliga førleika, fíggjartørv og aðrar viðkomandi upplýsingar, sum eru neyðugar fyri málsviðgerðina hjá nevndini.
Mælt verður umsøkjara til at seta seg í samband við Granskingarráðið fyri at fáa ítøkiliga ráðgeving í sambandi við umsóknina.
---
Hendan lýsingin og "Terms of reference" kunnu broytast inntil 6 vikur áðrenn umsóknarfreistina. Um broytingar verða gjørdar, verður tað fráboðað her.
Almannakunngjørt 30. august 2024.