Sjúkrakassagrunnurin - høvuðsøki 2
Stuðul til gransking og menning innan raðfest økir, sum kann menna heilsuøkið í Føroyum
Granskarar kunnu saman við stovni í Føroyum søkja um stuðul til gransking og menning innan fimm raðfest heilsuøkir, har t.d. epidemiologi og ílegugransking kunnu innganga í hvørt einstakt øki, eins og t.d. menning av nýggjum tilgongdum, skipanum ella tænastum.
Stuðul kann veitast til smærri verkætlanir, samstarvsverkætlanir, ph.d.verkætlanir og post.doc. verkætlanir innan raðfestu økini.
Raðfestu økini eru (nevnd í bókstavarað):
• Heilsa sum sosialt fyribrigdi - kanning av sosialum viðurskiftum, sum ávirka heilsu og sjúku, og hvussu sosialir trupulleikar, sum fylgja av sjúku, kunnu bøtast. Her kunnu samfelagsviðurskifti og ávirkan á heilsustøðu verða greinað
• Heilsa sum medisinskt fyribrigdi - kanning av medisinskum viðurskiftum, sum ávirka heilsu og sjúku, td. autoimmunar sjúkur, neurodegenerativar sjúkur og giktasjúkur
• Hjartasjúkur - gransking/ kanning av sjúkum í hjarta og blóðrensli, orsakum til hjartasjúkur, fyribyrging og viðgerð
• Krabbamein - epidemiologiskar kanningar og onnur gransking innan krabbameinsøkið
• Sálarfrøðilig heilsa - gransking og kanningar innan sálarsjúku og fyribyrgjandi tiltøk
Miðast skal eftir at býta avsetta stuðulin nøkulunda javnt millum raðfestu økini.
Atlit skal takast til, at stuðulin skal gagna øllum økjum í landinum.
Fyrsta umsóknarfreistin fyri høvuðsøki 2 var 1. september 2014.
Onnur umsóknarfreistin fyri høvuðsøki 2 var 1. september 2015.
Triðja umsóknarfreistin fyri høvuðsøki 2 var 1. september 2016, tá bar til at søkja til økini Hjartasjúkur og Krabbamein.
Fjórða umsóknarfreistin fyri høvuðsøki 2 var 1. september 2017, tá bar til at søkja til økini Hjartasjúkur og Krabbamein.
Til høvuðsøki 2 vóru 11,8 milliónir kr. tøkar í tíðarskeiðnum 2014-2017. Knappar 6 mill kr. av hesum vóru játtaðar til verkætlanir í 2014, 3,2 mill. kr í 2015, 0,6 mill. kr í 2016 og 2 mill. kr í 2017.
Tann 1. apríl 2019 varð restfæið úr Sjúkrakassagrunninum leysgivið. Hetta saman við avlopi frá tveimum steðgaðum verkætlanum varð boðið út í fimta og seinasta umsóknarumfarinum við freist 1. september 2019. Slakar 4 mió. kr. vóru játtaðar til verkætlanir í 2019.
Tað verða ikki fleiri umfør á hesum økinum.