Stuðul til gransking á arbeiðsmarknaðarøkinum 2025
Granskingarráðið lýsir við stuðli til granskingarverkætlanir um arbeiðsmarknaðin í Føroyum.
Yvirskipað skulu verkætlanir, sum fáa stuðul, gagna arbeiðsmarknaðinum frameftir.
Talan kann verða um gransking, ið fevnir um allan arbeiðsmarknaðin, eins og talan kann vera um gransking í viðurskiftum, sum hava serligan týdning fyri starvsfólk í ávísari vinnu ella á ávísum starvsøki.
Virkisøkið er ikki avmarkað, men tað er ein treyt, at talan er um gransking í viðurskiftum, sum eru viðkomandi fyri partarnar á arbeiðsmarknaðinum, ella gransking í øðrum arbeiðsmarknaðarviðurskiftum, sum tørvur er á at fáa lýst.
Bert granskarar, sum eru starvssettir á ella samstarva við granskingarstovnar í Føroyum kunnu søkja um stuðul. Allur játtaður stuðul skal nýtast í Føroyum, undantikið útreiðslur til ferðing og ráðstevnuluttøku.
Umsóknarfreistin er 17. februar 2025, kl. 12.00 (á middegi) føroyska tíð.
Stuðul kann latast til gransking, ið verður:
- framd av føroyskum granskara ella
- framd í samstarvi við føroyskan granskingarstovn og
- mett at hava samfelagsligan týdning fyri Føroyar
Stuðul kann latast verkætlanum við grund- og nýtslugransking:
- ph.d.-verkætlanum
- postdoc og øðrum verkætlanum, sum eru longri enn 6 mánaðir
Dentur verður lagdur á:
Vísindaliga góðsku, ávirkan og greiða verksetan
Tað er ein fyrimunur, at tann einstaka verkætlanin styrkir føroyska granskingarumhvørvið við:
- dátum og varandi vitan og førleikum
- samstarvi millum fleiri granskarar/granskingarstovnar og viðkomandi stovnar/felagsskapir
- altjóða samstarvi og flytføri
Tað er krav, at:
- í minsta lagi 1/3 verður fíggjaður av øðrum enn Granskingargrunninum.
Minstamark fyri stuðli til eina verkætlan er 300.000 kr. Einki loft er fyri samlaðu fíggjarætlanina, men játtan frá Granskingarráðnum fer sjáldan væl upp um 1,1 mió. kr. til granskingarverkætlanir, ella 1,7 mió. kr. til ph.d.-verkætlanir.
Upp til í mesta lagi 3 mió. kr. eru tøkar til stuðul í 2025.
Umsóknir skulu skrivast á enskum á umsóknarportalinum.
Vinarliga les krøv og vegleiðing í skjalinum Terms of reference, áðrenn umsóknin verður send.
Ein fyrimynd er eisini til verkætlanarlýsingina
Umsóknir um stuðul úr stuðulsskipanini skulu nágreiniliga lýsa ta verkætlan, sum stuðul verður søktur til. Eisini skulu umsóknirnar gjølla lýsa fakliga og vísindaliga førleika umsøkjarans. Umsøkjari skal skjalprógva sín fakliga førleika, fíggjartørv og aðrar viðkomandi upplýsingar, sum eru neyðugar fyri málsviðgerðina í nevndini.
Mælt verður umsøkjara til at seta seg í samband við Granskingarráðið fyri at fáa ítøkiliga ráðgeving í sambandi við umsóknina.
---
Hendan lýsingin og Terms of reference kunnu verða broytt upp til seks vikur undan umsóknarfreistini. Um lýsingin verður broytt, verður tað fráboðað her.
Almannakunngjørt 30. august 2024